बच्चू के थप्पड की गूंज…

मिळते हे माहीत नसलेल्या विद्वानांनी बच्चू कडू कसे गुंड आमदार आहेत, यावर आपली अक्कल पाजळणे सुरू केले आहे. हे बच्चू अगदीच ‘कडू’ आहेत किंवा कडू अजूनही ‘बच्चू’च आहेत, असे शब्दांचे खेळही झालेत. बाहेर सर्वसामान्य माणसांमध्ये मात्र वेगळीच प्रतिक्रिया आहे. मुजोर आणि भ्रष्ट अधिकार्‍यांना बच्चूंचीच भाषा कळते. संघटित झुंडशाहीच्या जोरावर सरकारला नमविणार्‍या अधिकार्‍यांना धडा शिकविलाच पाहिजे, असा जनतेचा सूर आहे. व्यवस्थेची दुहाई देणार्‍यांना जनता असा विचार का करते, हे जरा समजून घेतलं पाहिजे.
……………………………………………………………………………………………………………………………………………
विदर्भातील अचलपूर मतदारसंघाचे आमदार बच्चू कडू  यांनी मंत्रालयातील उपसचिव भरत गावित यांना केलेल्या मारहाणीची चर्चा अद्यापही सुरू आहे. बच्चूंनी गावितांच्या खरंच थोबाडीत हाणली की नाही, हे खात्रीने एकतर बच्चू कडू सांगू शकतात किंवा गावित. एक गोष्ट मात्र नक्की. बच्चू कडूंच्या थप्पडची गुंज दोन दिवस मंत्रालयात गुंजत होती. ही थप्पड एवढी सणसणीत होती की केवळ गावितच नाही, तर मंत्रालयातील सर्वच कर्मचार्‍यांच्या डोळ्यासमोर भरदिवसा तारे चमकलेत.भविष्यात ही वेळ आपल्यावर येऊ नये म्हणून मंत्रालय कर्मचार्‍यांच्या संघटनेने दोन दिवस मंत्रालय वेठीस धरलं. मंत्रालयात सर्वसामान्य माणसांना काय ट्रीटमेंट मिळते हे माहीत नसलेल्या विद्वानांनी लगेचच बच्चू कडू कसे गुंड आमदार आहेत, यावर आपली अक्कल पाजळणे सुरू केले. हे बच्चू अगदीच ‘कडू’ आहेत किंवा कडू अजूनही ‘बच्चू’च आहेत, असे शब्दांचे खेळही झालेत. बच्चू कडूंचा इतिहास कसा गुंडगिरीचा आहे, अशी लेखनकामाठीही झाली. बाहेर सर्वसामान्य माणसांमध्ये मात्र वेगळीच प्रतिक्रिया आहे. मुजोर आणि भ्रष्ट अधिकार्‍यांना ही बच्चूंचीच भाषा कळते. संघटित झुंडशाहीच्या जोरावर सरकारला नमविणार्‍या अधिकार्‍यांना धडा शिकविलाच पाहिजे, असा जनतेचा सूर आहे. व्यवस्थेची दुहाई देणार्‍यांना जनता असा विचार का करते, हे जरा समजून घेतलं पाहिजे.

गेले काही वर्षे अपंगांना त्यांचे मूलभूत अधिकार मिळावेत म्हणून हा माणूस झगडतोय. या अपंगांमुळे त्यांच्या व्होट बॅंकेत काही भर पडेल, असं काही नाही. पण सातत्याने हा धडका मारतोय. अपंगांच्या मागण्यांकडे सरकार दुर्लक्ष करते म्हणून मुंबईतील शासकीय इमारतींच्या भिंती रंगविण्याचं काम त्यांनी मध्यंतरी केलं होतं. त्यांच्या सातत्यपूर्ण प्रयत्नांमुळे अपंगांच्या अनेक मागण्या मार्गी लागल्या आहेत. अनेक पाईपलाईनमध्ये आहेत. या माणसाबद्दल सांगण्याजोगं खूप काही आहे. ही ‘बच्चू गाथा’ सांगण्याचं कारणच हे की, केवळ सनसनाटी निर्माण करण्यासाठी बच्चू असे वागत नाही. व्यवस्थेबद्दलच्या संतापातून, अधिकार्‍यांच्या टोकाच्या हेकेखोरपणातून त्यांच्या हातून आततायीपणा घडतो. अर्थात त्यांच्या कृतीचं सर्मथन करण्याचं कारण नाही. मात्र अधिकार्‍यांबद्दल संताप का निर्माण होतो, हेही जरा समजून घेतलं पाहिजे. सामान्य जनतेचं जाऊ द्या. लाखो लोकांचं प्रतिनिधित्व करणार्‍या आमदारांसोबत मंत्रालयातील वरिष्ठ अधिकारी कसे वागतात, हे जरा आमदारांना खासगीत विचारा. मध्यंतरी मुख्यमंत्र्यांवर अधिकारी आपलं ऐकत नाही, हे सांगण्याची पाळी आली होती, यावरून काय ते लक्षात घ्या. अधिकारी प्रचंड उद्दाम आणि भ्रष्ट झाले आहेत, याबद्दल दुसरं मतच नाही. मंत्रालयात राज्य कोणाचंही असू द्या. राजे अधिकारीच आहेत. बच्चू कडूंनी अधिकार्‍याच्या कानाखाली वाजविली तर यांनी मंत्रालय डोक्यावर घेतलं; पण आपल्यातल्या भ्रष्ट अधिकार्‍यांबद्दल ते कधी तोंड उघडताना दिसले नाहीत. संघटित ताकदीचा केवळ हितसंबंध जपण्यासाठी वापर केला जातो. हे अधिकारी काही मनाविरुद्ध घडलं तर त्वरेने मंत्रालयातलं कामकाज बंद पाडतात. सातवा वेतन आयोग, महागाईभत्त्यासाठी सरकारचं नाक दाबतात. मात्र राज्याच्या कानाकोपर्‍यात गेल्या २0 वर्षांपासून शेकडो शेतकरी आत्महत्या करताहेत, त्यासाठी संघटनेच्या पातळीवर मंत्रालयातील अधिकारी, कर्मचारी संघटना काही मदत करते आहे, हे कधी दिसलं नाही. सध्या मराठवाड्यात पाण्यासाठी वणवण सुरू आहे. एकेक थेंब पाण्यासाठी माणसं सैरावैरा भटकत आहेत. त्या विषयात सरकारी उपाययोजना वेगात व्हाव्यात, यासाठीही मंत्रालय कधी हलत नाही. केवळ आपल्या बुडाला शेक लागला की हे अधिकारी जागे होतात. बच्चू कडूंनी विधानसभेत जी मागणी केली ती अगदी योग्य आहे. सरकारी अधिकार्‍यांची संपत्ती दरवर्षी जाहीर झाली पाहिजे. भुजबळांची संपत्ती समोर आली तर सार्‍यांचे डोळे दीपून गेलेत. मात्र राज्यातील आयएएस, आयपीएस लॉबी आणि बांधकाम, पाटबंधारे आदी मलाईदार खात्यातील वरिष्ठ अधिकार्‍यांची संपत्ती जरा तपासली पाहिजे. अनेक सुरस गाथा बाहेर येतील. राजकारण्यांएवढेच अधिकारी भ्रष्ट आहेत. व्यवस्थेची ऐशीतैशी करण्यात यांचाही त्यांच्याएवढाच किंबहुना अधिक महत्त्वाचा वाटा आहे. त्यामुळे बच्चू कडूंच्या थप्पडमुळे व्यवस्थेला धोका वगैरे निर्माण झाला आहे, असा गळा काढण्यात अर्थ नाही. व्यवस्थेत राहून ती व्यवस्था पोखरणार्‍यांच्या माजोरीपणामुळे हे असे प्रकार यापुढेही होणार आहे. संतापलेली माणसं शेवटी अधिकार्‍यांना जी भाषा कळते, त्यातच बोलणार आहेत.